Kagawad gitigbas, patay

Sunday, February 12, 2012

SOUTH COTABATO -- Usa ka barangay kagawad ang namatay human siya gitigbas alas 7:00 sa buntag niadtong Biyernes.

Ang biktima giila nga si Sarsi Aloy, 44, minyo ug molupyo sa Todok Tolufo, lungsod sa T'boli.

Base sa spot report sa South Cotabato Police Provincial Office, gipusil ang biktima atol sa iyang paggawas sa ilang balay sa sayo sa buntag.

Si Aloy gisugat sa iyang silingan nga si alyas Nonoy dayon gitigbas sa makadaghan nga higayon gamit ang mahait nga sundang.

Nakaangkon og daghang samad si Aloy sa nagkadaiyang parte sa iyang lawas samtang ang suspek daling misibat paingon sa wala matino nga dapit.

Walay nahimo ang mga sibilyan sanglit kalit kaayo ang hitabo ug dunay mga kauban ang suspek nga anaa lamang sa palibot.

Sa wa pa gipatay ang biktima, giingon nga nagkalalis sila sa suspek gumikan lamang sa personal nga bangi sa yuta nga ilang gitikad.

Sa kasamtangan, padayon ang imbestigayon sa kapulisan ug gikatakda sab nga ipasaka ang kasong murder batok sa suspek. (Edgardo Fuerzas)

Gipatik sa mantalaang SuperBalita Davao Pebrero 13, 2012.