Mga ekipo gidauban sa NPA

Sunday, February 12, 2012

DIGOS CITY -- Gidauban sa armadong lalaki ang duha ka mga ekipo nga gipanag-iyahan sa usa ka pribadong kompanya samtang giparada didto sa Purok Sampaloc, Barangay Sinawilan.

Suma ni Police Superintendent Solomon de Castilla, hepe sa Digos City Police Office, nahitabo ang pagpangsunog alas 11:30 sa gabii niadtong Sabado.

Have something to report? Tell us in text, photos or videos.

Nasayran nga kalit miabot ang tulo ka mga wa mailhing lalaki ug gisunog ang usa ka Volvo nga backhoe ug crane.

Mga ekipo gipanag-iyahan sa Algon Engineering Construction nga maoy nagtrabaho sa giayong Sta. Cruz-Digos national highway.

Nagtuo ang 39th Infantry Battalion sa Philippine Army nga sakop sa mga rebeldeng New People's Army (NPA) ang naghimo sa krimen.

Mga NPA mao sab ang nagsunog sa mga ekipo sa Intsik didto sa gitrabahong kalsada sa lungsod sa Bansalan, Davao del Sur niadtong Nobyembre 2011.

Giingon sa militar nga supak ang mga rebelde sa kalamboan nga gipahigayon sa gobyerno.

Suma ni Lieutenant Raul Villegas, Civil Military Operations (CMO) officer sa 39th IB, mihimo na sila og hot pursuit operation aron gukdon ang mga suspek.

Gibanabanang mikabat sa sa P13.3 milyones ang danyos sa nasunog nga mga ekipo. (Orlando Dinoy)