P1 milyon natangag sa kawatan

Sunday, February 12, 2012

KAPIN usa ka milyon ka pesos ang kantidad sa mga alahas nga nakuha sa wa mailhing mga kawatan human giransak nila ang usa ka balay didto sa Piggy Foe Street, Villa Corazon Subdivision, Barangay Catalunan Grande, syudad sa Davao.

Nadiskubrehan ang pagpanglungkab alas 8:10 sa gabii niadtong Sabado base sa pahayag ni Bernardo Diamse Isla, 56, minyo, empleyado sa Allied Bank ug nagpuyo sa Block 3, Lot 14, Piggy Foe Street, Villa Corazon Subdivision.

Have something to report? Tell us in text, photos or videos.

Base sa imbestigasyon ni PO3 Ronald Baguio sa Talomo Police Station, nasayran nga nadiskubrehan ni Isla uban sa iyang asawa ug anak ang pagpanglungkab sa pag-uli nila sa balay gikan sa downtown area.

Naabli na usab ang duha nila ka mga kwarto ug nangawala na ang mga alahas nga gipanag-iyahan sa magtiayong Isla nga nagkantidad og P1,004,000.

Nahanaw mao ang bulawan nga mga ariyos, kwentas ug pulseras nga dunay mga diyamante, mahalong sing-sing ug relo.

Gituohan nga miagi ang mga kawatan sa luyo nga bahin sa balay ug gipangtangal ang lima ka mga bildo nga jalousy sa bintana ug miagi sa comfort room sa kwarto sa anak sa biktima.

Naniid na karon ang kapulisan sa gipuy-an sa biktima sa pamasin nga dunay nakaila sa mga kawatan.