800 eksplosibo nakaplagan sa kasagbutan

Monday, February 13, 2012

OTSO siyentos ka mga eksplosibo ang nakaplagan sa usa ka batang lalaki nga nanugway sa iyang binuhing baka daplin sa kalsada duol sa Deca Homes Resort sa Barangay Tacunan, Tugbok District, siyudad sa Davao.

Si Police Senior Inspector Antonio C. Villacarlos sa Tugbok Police Station nagbutyag nga ilang nahipus ang mga eksplosibo alas 6:30 sa buntag niadtong Lunes.

Have something to report? Tell us in text, photos or videos.

Mga eksplosibo unang nasiplatan ni Elton, 12, samtang nanugway sa iyang mga binuhing baka alas 3:00 sa hapon niadtong Dominggo.

Base sa imbestigasyon sa kapulisan, nasiplatan sa bata ang usa ka tawo nga nagsakay og motorsiklo nga kanunay nagsusi sa mga kahon nga gibilin sa lugar.

Ang gihimo sa wa mailhing lalaki gitaho sa bata ngadto sa Deca Homes Community Police Assistance Center (Compac) mao nga gitaho sab dayon sa Tugbok Police Station.

Gisusi dayon ang kahon nila SPO1 Consorcio Gerones Jr. sa Technical Support Platoon ug ilang nasuta nga mga eksplosibo ang sud niini nga gidudahang gamiton sa pagdinamita sa mga isda.

Nakuha sab nila ang pula nga fuse nga dunay gitas-on nga 1,000 metros.

Naningkamot karon ang kapulisan nga mailhan ang tag-iya sa mga eksplosibo aron pasakaang og kaso didto sa korte. (Ivy C. Tejano)