Amahan nagpakamatay kay anak naghikog

Monday, February 13, 2012

SARANGANI PROVINCE -- Naghikog patay ang usa ka amahan alas 3:40 sa hapon niadtong Dominggo.

Ang biktima mao si Felecito Babor Sr., 49, minyo ug molupyo sa Barangay Ilaya, Glan.

Have something to report? Tell us in text, photos or videos.

Base sa spot report sa Police Regional Office 12, nananghid lamang ang biktima nga kuhaon ang gitugway nga kabaw apan dugay kining nakabalik sa ilang balay.

Dihang gisusi iyang mga paryente, ilang nasiplatan nga wala nay kinabuhi si Babor sanglit naghikog siya ilawom sa punoan sa mangga.

Gigamit sa biktima sa iyang paghikog ang pisi sa iyang kabaw nga gihikot sa iyang liog ug ang isig ka tumoy sa pisi gihigot sa sanga sa mangga.

Subay sa taho nga naghikog ang biktimang si Felecito Sr. tungod kay di niya madawat ang paghikog patay sa iyang anak nga si Felecito Babor Jr., nagpuyo sa Barangay Fatima, General Santos City.

Nasayran nga naghikog si Felecito Jr. tungod kay naguol siya nga gihimo siyang saksi sa paghikog usab sa iyang higala nga barangay kagawad sa lungsod sa Glan, Sarangani Province. (Edgardo Fuerzas)