Gihapsan sa kainom, kritikal

Monday, February 13, 2012

DAVAO DEL NORTE -- Kritikal pa ang kahimtang sa usa ka 50 anyos nga lalaki human gitigbas sa iya ra usab nga kainom alas 6:30 sa gabii niadtong Dominggo.

Nahitabo ang pagpanigbas didto sa Purok 2, Barangay Quezon, Panabo City.

Have something to report? Tell us in text, photos or videos.

Giila sa otoridad ang biktima nga sila si Richard Mapa, minyo, molupyo sa Purok 6, Barangay San Francisco, Panabo City.

Samtang ang suspetsado giila sa pangalang si Banjon Villamil, hamtong ang pangedaron, molupyo sa Purok 2, Barangay Quezon, Panabo.

Nasayran nga si Mapa ug Villamil nag-inom sa maong dapit apan human sa pipila ka oras nagkalalis sa wala maklarong hinungdan.

Tungod sa kasuko sa suspek, mikuha og sundang ug diretsong gihapsan ang biktima tumong sa nawong, tangkugo ug kamot.

Daling misibat ang suspetsado palayo sa nahitaboan samtang ang biktima daling gihatud sa Panabo Emergency Hospital. Apan tungod kay grabe ang kahimtang sa biktima, gibalhin siya didt sa Davao Regional Hospital sa Tagum.

Kapulisan sa Panabo City Police Office nangita na karon sa suspek aron nga sikopon. (Teddy Cabana)