Gipatay tungod sa utang

Monday, February 13, 2012

DAVAO DEL SUR -- Tungod sa utang nga P500 lang ang hinungdan nga gipatay ang usa ka mag-uuma kinsa nagdumili nga mobayad sa upat ka tuig niyang utang sa suspetsado niadtong Dominggo.

Ang insidente nahitabo ala 1:45 sa hapon nga miresulta sa kamatayon ni Lidas Lipong, 60, nagpuyo sa Sityo Datu Danwata, lungsod sa Malita.

Have something to report? Tell us in text, photos or videos.

Si Lipong gipatay sa suspek nga si Cavelino Mallada, 25, minyo, nagpuyo sa maong lugar.

Suma ni Malita Police Station commander Chief Inspector Samsong Kimayong nga nahitabo ang insidente dihang naningil ang suspek sa utang ni Lipong.

Gikataho nga miadto ang suspek sa balay sa biktima aron singlon ang upat na ka tuig nga utang.

Imbes mobayad ang biktima, mikuha hinuon siya og sundang dayon gitigbas ang suspek nga miresulta sa ilang pag-inilogay sa hait nga sundang.

Nailog ni Mallada ang sundang hinungdan nga iyang gitigbas ang liog ug giabis ang ubol-ubol sa biktima.

Wa na madala sa tambalanan ang biktima sanglit namatay dayon siya human maabis iyang ubol-ubol.

Boluntaryong mitahan sa iyang kaugalingon ang suspek hinungdan nga gibilanggo siya karon sa selda sa kapulisan sa Malita.

Nasayran nga dunay pending warrant of arrest ang biktima gikan sa Regional Trial Court Branch 18 nga gipaguwa ni Presiding Judge Carmelita Sarno-Davin niadtong Hunyo 29, 2010.

Ang namatay dunay giatubang nga kasong robbery with homicide nga way girekomendang bail bond.