Pulis gipusil, patay

Monday, February 13, 2012

COTABATO CITY -- Patay ang usa ka sakop sa Philippine National Police (PNP) human siya gipusil alas 6:20 sa gabii niadtong Dominggo.

Ang biktima mao si SPO1 Salapuddin Haron, 42, minyo, nadestino sa Maguindanao Provincial Police Office ug nagpuyo sa Esteros, Cotabato City.

Have something to report? Tell us in text, photos or videos.

Gibutyag ni Cotabato City Police Director Danny Reyes nga samtang pauli na ang biktima sakay sa iyang XRM nga motorsiklo gikan nagsambayang sa usa ka mosque sa ilang lugar, nasayran nga dihang miabot ang biktima atubangan sa Cotabato Regional and Medical Center, gisundan siya sa duha ka mga lalaki nga nagsakay og motorsiklo.

Mga suspek wa naglangan og panahon, ilang gipusil ang biktima sa makadaghan nga higayon gamit ang M16 Armalite rifle.

Abtik nga misibat ang mga kriminal sakay sa DT Yamaha nga motorsiklo nga walay plaka paingon sa wala matinong direksiyon.

Si Haron daling gidala sa mirespondeng pulis ngadto sa tambalanan, apan pipila ka minuto namatay ang biktima.

Ang biktima nakaangkon og pito ka samad pinusilan sa nagkadaiyang parte sa iyang lawas nga maoy hinungdan sa iyang kamatayon.

Ang kapulisan nagsusi na sa maong hitabo aron ilhon ang mga tawo nga nalambigit sa krimen. (Edgardo Fuerzas)