3 patay, 9 angol sa engkuwentro

Tuesday, February 14, 2012

RAJAH BUAYAN, Maguindanao - Tulo ang namatay samtang siyam ang naangol sa nahitabong engkuwentro tali magka-away nga pamilya alas 4:00 sa hapon niadtong Lunes.

Si 6th Infantry Division Public Affairs chief Colonel Prudencio Asto nagbutyag nga gisulong sa grupo ni Barangay Baital captain Jerry Makalay ang balay ni Barangay Malibolok captain Kagi Duma Onayan didto sa lungsod sa Rajah Buayan.

Have something to report? Tell us in text, photos or videos.

Matud ni Asto nga ang pagsulong sa grupo ni Makalay maoy hinungdan sa katag-katag nga pinusilay sa duha ka pundok gamit ang tag-as nga matang sa armas.

Miatras ang grupo ni Makalay alas 7:00 sa gabii apan alas 2:00 sa kaadlawon miatake na sab ang grupo ni Onayan sa dapit nga gitaguan ni Makalay.

Gumikan sa katag-katag nga engkuwentro sa duha ka pundok miabot ngadto sa 2,800 ka pamilya ang namakwit gikan sa pito ka barangay nga apektado sa kasamok.

Suma ni Rajah Buayan ABC president Councilor Engr. Zamsamin Ampatuan nga rido ang hinungdan sa panagbangi sa grupo ni Makalay ug Onayan.

Mga sibilyan nga namakwit gikan sa pito ka barangay ug temporaryong gibutang sa mga eskuwelahan, mosque ug munisipyo.

Dunay grupo na nga gitahasan si Maguindanao Governor Esmael "Toto" Mangudadatu aron resulbahon ang away sa duha ka pundok.

Gikatahong miabot na sab sa dapit ang dugang puwersa sa militar nga maoy magbantay sa seguridad sa mga sibilyan nga apektado sa kagubot. (Edgardo Fuerzas)