Ginang gipusil, patay sud sa ilang balay

Tuesday, February 14, 2012

PATAY nang midangat sa tambalanan ang usa ka ginang human gipusil sa duha ka wala mailhing lalaki alas 11:00 sa buntag kagahapon didto sa Barangay Baliok, distrito sa Talomo, siyudad sa Davao.

Ang biktima mao si Yolly Lopez, 48, minyo, nagpuyo sa Block 8, Lot 4, London Street, Rosalina Village, Barangay Baliok.

Have something to report? Tell us in text, photos or videos.

Base sa inisyal nga pakisusi sa Superbalita, nahitabo ang pagpamusil samtang naghigda ang biktima sa ilang terrace sanglit nagpakuha og uban sa buhok sa iyang katabang nga si Mary Joy.

Mga saksi nagbutyag sa Superbalita nga kalit lang miabot ang duha ka mga lalaki nga nagpahipi sa koral dayon gipusil ang biktima unom ka higayon.

Human sa pagpamsusil, suma sa mga saksi, daling misibat ang mga mamumuno sakay sa motorsiklo paingon sa wa masayri nga lugar.

Ang biktima gidala sa iyang kabanay sa Malta Hospital apan gideklarang dead on arrival sa mga doktor nga nag-atiman kaniya.

Nakuha sa kapulisan ang mga basiyo sa bala sa .45 kalibre nga pistola nga gigamit sa mga kriminal sa paghimo sa krimen.

Gihaya na karon ang biktima sa St. Peter's Funeral Homes samtang gipaabot ang iyang bana nga moabot gikan sa laing nasud.

Ang biktima dunay nahibilin nga duha ka mga menor de edad nga anak. (Blue Cordero)