Mayor pabor wagtangon ang sugal

Tuesday, February 14, 2012

DIGOS CITY - Pabor si Mayor Joseph Peñas sa resolusyong gisang-at sa Sangguniang Panlungsod (SP) nga hingpit nagdili sa tanang matang sa ilegal nga sugal sa dakbayan ilabi na ang Last Two.

Si Konsehal Serafin Senajon Jr., kinsa maoy nangamahan sa resolusyon, nagbutyag nga kinahanglan nang masumpo ang mga pronton sa dakbayan ilabi na nga lantaray na ang pagmuntar niini duol sa mga tunghaan, simbahan ug bisan sa mga police outpost.

Have something to report? Tell us in text, photos or videos.

Ang ubang mga ushers mosulod na sa mga buhatan sa gobyerno aron magpataya niini.

Nilutaw nga wala nay gikahadlokan ang nagpaluyo sa sugal nga Last Two sanglit bisan mga pulis motaya sab.

Gumikan niini, gihagit sa Konseho ang amahan sa dakbayan nga tinud-on ang pagsumpo sa maong sugal.

Sa pakighinabi sa Superbalita, gikanayon ni Peñas nga dako ang iyang pag-uyon sa lakang sa Konseho.

"It is high time already to stop all these kinds of illegal gambling ang it is a political will," matud ni Peñas.

Gimando na ni Pe¤as ngadto sa Digos City Police Office (DCPO) ang paglutos sa mga nagpaluyo sa Last Two pinaagi sa pagpadlak sa mga pronton.

Sa bahin ni Superintendent Solomon de Castilla, hepe sa DCPO, nagbutyag nga andam silang gub-on ang mga Last Two outlet aron di na mapuslan.

Gilauman karon sa mga opisyal sa dakbayan nga sundon sab sa ubang kalungsuran ang ilang lakang aron hingpit nang mapakgang ang sugal ilabi na nga nilutaw ang hungihong nga di kini masulbad hangtud nagpabilin nga modawat og ekis ang kapulisan dinhi sa Davao Region. (Orlando B. Dinoy)