Principal giaresto

Tuesday, February 21, 2012

USA ka principal ang gisikop sa mga otoridad tungod sa kasong falsification, paglapas sa Anti-graft and Corrupt Practices Act, ug Illegal Exaction kagahapon didto sa SM City, Ecoland, siyudad sa Davao.

Gisikop mao si Deody Salvosa, hamtong ang pangidaron, nagpuyo sa Blk. 8, Lot 3, Wellspring Village, Barangay Catalunan Pequeno, Talomo District, ning siyudad.

Have something to report? Tell us in text, photos or videos.

Si Salvosa principal sa Mabini National High School apan tungod kay duna siyay kaso sa korte, nagtagu-tago na siya aron di masikop sa mga otoridad.

Ang akusado gisikop sa mga otoridad pinaagi sa alias warrant of arrest nga gipaguwa ni Judge Virginia Hofilena Europa sa Regional Trial Court Branch 11 pinetsahan Oktubre 7, 2011.

Si Salvosa gipasakaan og kaso tungod kay wa niya ma-remit ang koleksiyon nila gikan sa mga estudyante alang sa Philippine National Red Cross.

Ang akusado nagbutyag nga wa siya mitungha sa iyang mga hearing sa kaso sa korte tungod kay dunay hulga sa iyang kinabuhi.

Anaa karon sa selda sa San Pedro Police Station ang akusado samtang gipaabot niya ang adlaw nga taralon siya sa korte.