Cagas, Peñas naghiklin sa politika

Wednesday, February 22, 2012

DIGOS CITY - Gihiklin una sa duha ka politikong nagkabangi aron molagda sa Memorandum of Agreement (MoA) nga mananom og 1.5 bilyong kahoy sa probinsiya sa Davao del Sur.

Ang MOA gihimo alang sa programang Generation, Redemption, Expansion of Environmental Protection Initiatives of the Philippines (GREENIN-Philippines).

Have something to report? Tell us in text, photos or videos.

Si Mayor Joseph Peñas nagsulti sa SuperBalita nga apil siya sa giimbitahan ni Davao del Sur Governor Douglas Cagas alang sa pagpirma sa maong kasabutan niadtong Lunes didto sa Davao del Sur Sports Complex.

Gipatawag ni Cagas ang mga mayor sa Davao del Sur gawas sa lungsod sa Malita nga si Mayor Benjamin Bautista Jr. kinsa wa mitambong sa aktibidad.

Duha ka MOA ang gihimo tali Ramon Aboitiz Foundation Incorporated (RAFI) aron motabang sa suliran sa climate change.

Mga kahoy nga 'endemic' o native ang ipangtanom di lang sa kabukiran apan mangita og dapit sa mga lungsod ug sa siyudad.

Ang RAFI nagsugod didto sa probinsiya sa Cebu diin gidumala sa mga Aboitiz ang Visayan Electric Cooperative.

Ang ikaduhang MoA gilambigitan sa mga tunghaan sa Holy Cross sa lalawigan diin nagtumong nga mananom og kahoy aron masulbad ang climate change.

Ang Davao del Sur maoy napili sa maong programa sanglit ania dinhi ang dakong luna nga mamahimong katamnan sa mga kahoy.

Gibutyag ni Cagas nga di lang ang tiilan sa Mt. Apo maoy angay nga tamnan og daghang kahoy sanglit mahimo sab kining buhaton sa patag.

Matud ni Pe¤as nga nindot ang katuyoan sa maong programa mao nga andam siyang mosuporta niini.

"Gani ni-amen pa ko niya kay ako man siyang Ninong, unya dako sab ko og respeto niya kay siya man ang gobernador," ni Peñas.

Giasoy ni Peñas nga di angay sagulan og politika ang pagluwas sa kinaiyahan sanglit nameligro sa pagbaha ang patag ugaling mobundak ang kusog nga uwan sa naupaw na nga kalasangan.

Bisan pa niini, gilantaw nga magsangka gihapon ang duha ugaling mahinayon si Cagas pagdagan isip mayor sa dakbayan sunod eleksiyon. (Orlando B. Dinoy)