Ginang naminyo katulo ka higayon gidemanda

Wednesday, February 22, 2012

USA ka 41 anyos nga babaye ang gidemanda sa Regional Trial Court (RTC) tungod sa pagminyo niya sa laing lalaki bisan nga minyo siya sa laing duha ka mga lalaki.

Ang City Prosecution Office (CPO) mipasaka sa kasong bigamy batok kang Jessica D. Enriquez, 41, base sa reklamo ni Vicente Abanto, 83, taga Quezon Boulevard, siyudad sa Davao.

Have something to report? Tell us in text, photos or videos.

Si Abanto, sa iyang affidavit, nagbutyag nga naminyo sila ni Enriquez niadtong Disyembre 29, 2010 pinaagi sa pari sa Iglesia Filipina Independientes.

Siya nagbutyag nga ang akusado nagdumili pag-ipon kaniya og puyo sa iyang balay sa rason nga wa siya masayud.

Gawas niini, siya nagkanayon nga ang akusado kanunay nangayo og pinansiyal nga suporta kaniya.

Si Abanto nagbutyag nga makadaghan na siyang napriso tungod sa himu-himo nga alegasyon batok kaniya ni Enriquez.

Miabot ang panahon niadtong Septyembre 2011, nadiskubrehan ni Abanto nga minyo diay ang iyang asawa ngadto sa lain pang duha ka mga lalaki pinaagi sa gipadala nga sertipikasyon sa National Statistics Office Manila Office of the Civil Registrar General.

Ang sertipikasyon gipirmahan ni Carmelita Ericta, NSO administrative and civil registrar general, mao nga iyang gipasakaan og kaso si Enriquez.

Ang akusado napakyas sa pagsumite sa iyang counter-affidavit sa maong kaso.

Nasuta ni Prosecutor Jose P. Garcia Jr. nga dunay lig-on nga basehan nga ipasaka ang kaso ngadto sa Regional Trial Court-Office of the Clerk of Court (RTC-OCC) kagahapon sa buntag.

Ang piskalya nagrekomenda nga mamahimong makapiyansa ang akusado sa kantidad nga P20,000 alang sa iyang temporaryong kagawasan. (Arianne Caryl N. Casas)