MILF nilimod nangatake sa City Jail

Wednesday, February 22, 2012

COTABATO CITY - Hugtanon nga gipanghimakak sa Moro Islamic Liberation Front (MILF) nga sila ang misulong sa City Jail sa siyudad sa Kidapawan alas 9:30 sa buntag niadtong Dominggo.

Kini maoy nahimong tubag ni MILF Civil Military Affairs Von Alhaq sa alegasyon nga mga miyembro sa Bangsamoro Islamic Armed Forces (BIAF) ang buot nga moluwas kang Datucan Samad, alyas Kumander Lastikman nga napriso sa maong bilanggoan.

Have something to report? Tell us in text, photos or videos.

Nasayran nga niadtong 2009, gilambigit sab ang MILF sa pagsulong sa Cotabato Provincial Jail aron luwason matud pa ang mga high risk detainees nga gibilanggo sa maong prisohan.

Si Lastikman gilambigit sa pagpatay sa 30 ka tawo niadtong miaging tuig sa Pikit, North Cotabato.

Suspek sab ang grupo ni Lastikman sa highway robbery-hold-up sa Cotabato-Davao Highway.

Si Lastikman nag-atubang og kasong Extortion, kidnapping, carnapping, robbery hold-up, multiple murder, multiple frustrated murder, arson ug pagpamomba.

Apan daghan ang nagtuo nga break-away group sa MILF nga mihimo sa pagpangatake aron nga luwason si Lastikman.

Sa kasamtangan, mas gipalig-on pa ang seguridad sa Kidapawan City Jail ug Cotabato Provincial Jail aron nga di na mausban ang insidente niadtong Dominggo. (Edgardo Fuerzas)