Katawhan giawhag moduyog sa Semana Santa

DIGOS CITY - Giawhag sa kaparian sa Simbahang Katoliko ang katawhan nga mosalmot sa mga kalihukan sa Semana Santa imbes mag-lingaw-lingaw sa bisan asang dapit sanglit way trabaho.

Taas ang bakasyon sa mga empleyado sanglit special non-working holiday karong Sabado ug non-working holiday sab ang Araw ng Kagitingan karong Abril 9.

Si Father Cornelio Toraja sa Mary Mediatrix Cathedral nagpahinumdom sa katawhan nga mas labing maayo nga ihalad sa katawhan ang ilang panahon ngadto sa Ginoo.

Nagkadaiyang kalihukan sa Semana Santa ang himuon sa Simbahang Katoliko sama sa Misa sa katapusang panihapon ni Hesukristo ug pito ka katapusang pulong (7 Last Words) karong Byernes Santo.

Gawas niini, aduna say mga ritwal ang Simbahan labot sa Pasyon ni Hesukristo mao nga gidapit nila ang mga Kristyano nga motambong niini.

Bisan si Fr. Bong Templa, kura paruko sa Immaculada Concepcion sa lungsod sa Bansalan, Davao del Sur, nagkanayon nga imbes moadto sa mga baybayon, beach resorts ug uban pang kalingawan, angayan nga unahon ang paghinumdon sa pagpasakit sa Dios.

Matud sa mga kaparian nga hatagan og bili ang paghandom niini sanglit dinhi naluwas ang katawhan gikan sa salang panulondon.

Nabatasan sa sa mga Pilipino ang maglaag-laag bisan asa panahon sa Semana Santa ug nakalimtan na ang ilang obligasyon isip Kristyano.

Matud sa duha ka pari nga mas labing maayo kung himuon na lang ang "Bisita Iglesia" o pag-adto sa mga Simbahan nga daw wa na ginahimo sa uban imbes moadto sa aing lugar.

Sa pikas bahin, gipataas na sab sa kapulisan ug militar ang ilang alerto aron bantayan ang mga simbahan.

Gipasidan-an sa mga otoridad ang katawhan nga mag-amping ug maghinay lang pagpadagan sa ilang sakyanan panahon sa Seman Santa. (Orlando B. Dinoy)