9 mananagat gipadpad sa lawod naluwas

DIGOS CITY - Siyam ka mananagat ang naluwas human sa tulo ka adlaw nga way kaon sa lawod human gipadpad sa daut nga panahon ang gisakyang panagatan niadtong Hunyo 12.

Sumala sa City Risk Reduction Management Council (CDRRMC) nga naningkamot ang mga biktima nga maluwas pinaagi sa pagkapyot sa mga gapnod hangtud nga nahidunggo sila sa kadagatan sa Don Marcelino, Davao del Sur, niadtong Huwebes.

Si Rey Caballero sa CDRRMC nitataw nga luwas na ang mga biktima nga sila si Rodrigo Rampus, Wilfredo Boloron, 49, Juan Dimanohan, 50, Irenio Ruiz ug alyas Victor 50.

Nipalawod ang mga mananagat padung unta sa Sigaboy, Governor Generoso apan pag-abot sa Davao Gulf kalit gihapak sa kusog nga balod ug hangin ang ilang sakayan.

Sanglit nabalaka ang mga partido nga sila si Helbert Jornales, Alfred Boloron ug Beo Hagoyahay nga wa mahibalik ang lima, gilayon silang niapas sa lawod aron mangita.

Apan ang tulo wa sab mahibalik dayon mao nga nilusad og search and rescue operation ang CDRRMC.

Laing usa ka mananagat ang wala pa panganli sa CDRRMC.

Sa lungsod sa Sarangani, Davao del Sur, luwas sab nga nakaabot sa baybayon sa Barangay Konel ang mga mananagat nga sila si Roel Entera ug Jenifer Carreon, pulos 23-anyos ug mga molupyo sa Barangay Camanga, Maasim, Sarangani Province.

Matud sa duha gikan sila sa ilang lugar sa dihang naabtan sa daut nga panahon samtang naa sa lawod.

Giatiman na sa lokal nga gobyerno ang mga naluwas nga mananagat kinsa nikanayon nga wa silay nadawat nga abiso bahin sa daut nga panahon niadtong higayona mao nga nipalawod sila.

Nagpahimagno na ang CDRRMC ngadto sa mga mangingisda nga dili una managat samtang ania pa sa nasud ang Bagyong Butchoy.

Ang mga molupyo sa bukid, gipabantay sab sa hayan mga pagdahili sa yuta ug mga pagbaha.

Matud ni Caballero mas maayong mobakwit sa mga evacuation centers nga giandam sa dakbayan ugaling mahitabo ang kalamidad. (Orlando B. Dinoy)