'Killer’ de-motor misiaw
-A A +ASunday, June 17, 2012
DIGOS CITY -- Di na mapugngan sa Digos City Police Office (DCPO) ang mga de-motorsiklong mamumuno human subling miatake sa Sitio Camiguin, Barangay Aplaya sa siyudad.
Usa ka 54-anyos nga lalaki ang pinakauwahing biktima alas 3:00 sa kaadlawon niadtong Sabado, subay sa taho ni PO2 Joie Pansan sa homicide section sa DCPO.
Ang biktima mao si Paul Atoan, drayber, minyo ug molupyo sa maong lugar.
Si Atoan namatay human gipusil sa usa sa mga mamumuno kinsa mikanaog gikan sa gisakyan nga motorsiklo.
Usa lamang ka samad pinusilan ang naangkon sa biktima kinsa nadala pa sa Davao del Sur Provincial Hospital (DDSPH) apan namatay kay nahutdan og dugo nga miagas gikan sa tuong liog.
Ang kapulisan nga nahidangat sa nahitaboan sa krimen nakahipus og duha ka mga basiyo sa bala sa .45 kalibre nga pistola.
Ang biktima maoy ikatulong napatay sa pagpamusil sa dakbayan, apan hangtud karon wa pa masulbad sa kapulisan.
Niadtong buwan sa Mayo, usa ka 23-anyos sab ang gipusil sa samang lugar, apan nalingkawas sa tinong kamatayon sanglit wa maantimano.
Gihagit karon ang Commission on Human Rights nga palawman ang sagunsong pagpamusil sa dakbayan. (Orlando B. Dinoy)
Gipatik sa mantalaang SuperBalita Davao Hunyo 18, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
