Giluba sa selosong 'mister'

IGACOS, Davao del Norte -- Kritikal karon ang kahimtang sa usa ka ginang human gidunggab sa makadaghang higayon sa iyang bana alas 4:30 sa hapon niadtong Lunes.

Ang biktima mao si Lyne Gonzaga, 39, molupyo sa Purok Lanzones, Barangay San Remegio, Kaputian District, Island Garden City of Samal.

Si Gonzaga gitambalan karon sa Southern Philippines Medical Center (SPMC) human siya gidunggab sa banang si Nestor Gonzaga, 42.

Milutaw sa imbestigasyon sa kapulisan nga ang motibo sa pagdunggab sa bana mao ang grabeng selos sa mga lalaki nga gidudahang karelasyon sa iyang misis.

Nasayran nga wa nakaantos ang suspek mao nga mikuha siya og 12 pulgadas nga kutsilyo dayon gidunggab ang asawa sa nagkadaiyang partes sa kalwasan.

Mga silingan maoy nagdala sa biktima sa Samal Emergency Hospital, apan tungod kay kritikal nga kahimtang gibalhin ang biktima sa SPMC.

Ang suspek daling misurender alas 6:30 sa gabii niadtong Lunes ngadto kang Kagawad Teroso Mebato.

Gikustodiya karon ang suspek sa Kaputian Police sub-Station.

Kasong frustrated parricide ang gihikay sa kapulisan aron nga ipasaka ngadto sa korte batok kang Nestor.