Kaso nga gikalambigitan sa pulis miubos -- CIAS

MIUBOS ang kasong giimbestigahan sa City Internal Affairs Service (CIAS) sa dakbayan sa Davao sa ikaduhang quarter ning tuiga itandi sa parehong quarter niadtong tuig 2011.

Base sa datus nga nakuha sa Superbalita gikan sa maong buhatan, migawas nga dunay siyam ka mga kaso nga padayon pang giimbestigahan gikan Enero hangtud ning buwan sa Hunyo.

Suma sa opisyal nga naghangyo nga di panganlan, mas ubos kini kon ikumpara sa kinse ka mga kaso nga natala sa parehong quarter niadtong 2011.

Kasagaran sa mga kaso nga nahimo sa mga pulis dinhi sa dakbayan sa Davao mao ang mis-conduct partikular ang pagpasagad sa trabaho ug illegal nga pagpabuto sa armas.

Human maimbestigahan sa CIAS ang kaso sa usa ka pulis, ila kining ipasa ngadto sa Police Regional Office nga maoy magdesisyon kung asa ang hearing sa maong reklamo ug si kinsa ang ibutang nga hearing officer.

Kasagaran sa mga gipasakaan og reklamo mao ang mga pulis nga dunay ranggo gikan sa Police Officer 2 (PO2) hangtud Senior Police Officer 1 (SPO1).

Duna usay pipila ka mga de ranggong opisyal sa pulis ang nag-atubang og reklamo sa maong buhatan. (Blue Cordero)