13 lugar sa Armm gipasidunggan

TRESE ka mga lugar sa Autonomous Region in Muslim Mindanao (Armm) ang gihatagan og pag-ila subay sa Seal of Good Housekeeping atol sa awarding ceremony sa Waterfornt Insular Hotel.

Ang paghatag og pag-ila dungan nga gihimo sa panagtigum sa mga stakeholders, subay sa ARMM Local Government Unit (LGU) Convention on Local Governance.

Ang duha ka adlaw nga aktibidad nga gipaluyuhan sab sa autonomous regional government, The Asia Foundation ug Balai Mindanao Foundation (BMF) nagsilbing dalan aron mapalambo pa ang pagbuligay sa nagkadaiyang ahensiya sa pagpatuman sa nagkadaiyang programa ug proyekto sa ARMM.

Pipila sa mitambong mao ang mga lokal nga opisyal gikan sa maong rehiyon, representante sa non-government organizations (NGOs), Davao City Mayor Sara Duterte ug daghan pa.

Ang makadawat sa Seal of Good Housekeeping hatagan sa plaque of appreciation ug P1M nga tseke gikan sa Performance challenge fund.

Mga recipients mao ang Datu Odin Sinsuat, Maguindanao; Parang, Maguindanao; Sultan Kudarat; Upi, Maguindanao; Wao Lanao del Sur; Pandami Sulu; Panglima Estino Sulu; Mamasapano Maguindanao; Guindulungan, Maguindanao; Talayan, Maguindanao; Paglat, Maguindanao; Sultan Mastura, Maguindanao; ug Datu Saudi Ampatuan, Maguindanao.

Luyo sa paghatag og pag-ila gihimo sab ang paglagda sa memorandum of agreement (MOA) alang sa implementasyon sa potable water supply project alang sa lain-laing lugar sa Armm.

Sa unang adlaw sa tigum nga gisugdan Hunyo 19, pipila sa gihisgutan ang estado sa lokal nga panggobyerno sa Armm, Health, Education, Livelihood, Peace and Governance Reform Synergy (HELPS) sa dapit. (Rhona O. Goc-ong)