Pagbisita ni Aquino nagubot

SUBLING nagkagubot ang mga militanteng pundok ug kapulisan kagahapon atol sa pagbisita ni Pangulong Benigno Aquino III dinhi sa siyudad sa Davao.

Nagtinulakay ug nagkabinunalay ang duha ka pundok tungod kay buot babagan sa mga militante ang kalsada nga agian sa convoy sa pangulo paingon sa Waterfront Insular Hotel.

Sa maong hotel gihimo ang Autonomous Region in Muslim Mindanao (Armm) Convention on Local Governance diin dinapit nga bisita si Aquino.

Sa wa pa miabot ang pangulo, mga militanteng pundok kalma kaayong nagplastar sa ilang mga plakard nga nagsaway sa gobyerno atubangan sa maong hotel.

Apan dihang nagsingabot ang convoy sa pangulo, kalit miatraka ang mga militanteng pundok paingon sa tunga sa kalsada mao nga gibabagan sila sa kapulisan.

"May negotiation kami nga di nila alihan ang among mga plakard inig abot ni PNoy. Pero, ilang gihapong gihimo mao nga midagan ang youth leaders sa tunga sa kalsada," pahayag ni Cherry Orendain, spokesperson sa Kabataan party-list dihang gihinabi sa Superbalita.

Si Orendain nagkanayon nga dunay nasamdan sa ilang grupo tungod kay nabunalan sa pulis nga gipangulohan ni Davao City Police Office director Sr. Supt. Ronald dela Rosa.

"Naa gyuy komosyon. Naa injured sa among youth leaders. Ang gihimo sa Presidential Security Group, sila ang tig-sugo sa mga pulis nga babagan mi," dason ni Orendain.

Ikaduha ka kining nahitabo ning tuiga nga nagkagubot ang pagbisita ni Pangulong Aquino dinhi tungod kay wa nagkasinabot ang kapulisan ug militanteng pundok.

"Among gisaway ang paghatag ni Noy og P100 million sa mga local officials sa ARMM. Iya kining gihimo aron ma-consolidate ang suporta karong eleksiyon," dugang ni Orendain.

Gawas niini, gibabagan sab nila ang gidusong balaudnon nga magpribado sa mga publikong ospital, water district, ug state universities.