Bise mayor hadlok kastiguhon sa Ombudsman

SI DAVAO City Vice Mayor Rodrigo Duterte midepensa nga gibuhat lamang niya ang iyang trabaho, tungod siya sab ang paninglon sa mas taas niya nga opisyal.

Gihimo nga ehemplo ni Duterte ang pagbantay nga ginahimo sa buhatan sa Ombudsman, unsa mang kapakyasan sa usa ka opisyal, manubag gyud siya niini sa maong buhatan.

"Naa tay Ombudsman. Kana tig-imbestiga na sa tawo sa gobyerno sa pag-implementar sa balaud. Ug ikay opisyal, magtan-aw ka nagkaguliyang, nagkamatay na wala nagtrabaho nang mga sakop nimo, naay ma-disgrasya. Ikaw mismo opisyal ma-demanda for failing to implement the law," pasabot ni Duterte.

Suma ni Duterte nga kinsa mang opisyal sa gobyerno nga di makahimo sa iyang tahas mamahimo nga makasuhan og administrative case ug criminal case nga didto dunggon sa Sandigan Bayan.

"Kami mga mayor, opisyal sa taas ang among demanda naa sa Manila. Ug ma-demanda ka sigeg balik ngadto, ang abogado, plete nimo, mao ray makaparot nimo sa kinabuhi."

Gidugang sa opisyal nga kinsa man kadtong mapamatud-an nga sad-an, silutan pinaagi sa suspensiyon sud sa pipila ka bulan, o tangtangon sa iyang katungdanan.

Dugang depensa ni Duterte nga dili kapritso o gusto lamang sa mga opisyal ug otoridad ang pagnakop sa mga payong-payong ug uban pang ilegal nga matang sa transportasyon, apan kini ang nakalatid sa balaud.

"Walay labot ang kaluoy ug kapobrehon dinhi. Ang balaud atong ginasaligan diha. Kami ginapapili mi sa taas kung kaya ba namo kay kung dili naa dayoy i-ilis namo. Sige mog mahay namo abi ninyo kami kontrabida. May batas eh, its either akong liog nakataya," pahayag sa bise mayor. (Rhona O. Goc-ong)