Duterte: Kulang ang pulis

KUNG siya ang pabut-on, buot ni Davao City Vice Mayor Rody Duterte ang mas daghang ihap sa mga pulis, aron masigurong mabantayan sa kinatibuk-an ang nagkadaiyang aktibidad palibot sa siyudad.

Mao kini ang tubag ni Duterte sa reklamong gipaabot kaniya nga may mga pulis ang wa naghimo sa ilang trabaho aron malikayan ang mga disgrasya sa dalan, sama sa Tigatto Road nga gikalambigitan sa mga payong-payong ug uban pang sama niini nga klase sa transportasyon.

Aminado ang bise mayor nga sa kadako sa siyudad, di gyud paigo ang gidaghanon sa mga pulis nga mobantay.

"Naay pulis, pero sa kadako sa Davao gamay ra gyud sila," ni Duterte sa programang “Gikan sa Masa, Para sa Masa.”

Ni Duterte, diyes mil ang ideal nga ihap sa mga pulis nga magbantay sa siyudad, apan sa kasamtangan, kapin usa ka libu lamang sila.

Dugang sa opisyal nga kun di gyud makab-ot ang maong ihap, mamahimo na ang siyete mil ngadto singko mil nga ihap sa kapulisan.

"Ideally, ang Davao dapat may 7,000 policemen or at the very least, 5,000. Kulang kaayo ta, ma-distribute nato ang tawo nga mobantay. Kanang 1,000 kapin bahinon pa na nimo, eight hours ang duty sa pulis eh," sigun sa bise mayor. (Rhona O. Goc-ong)