Duterte subling mipasabot pagdakop sa payong-payong

SUBLING mihatag og eksplanasyon si Davao City Vice Mayor Rody Duterte labot sa gihimong pagpanakop karon sa mga payong-payong, trisiboat ug trisikad nga nagbiyahean sa national highway, tungod sa negatibong komento gikan sa pipila ka tawo sa siyudad sa Davao.

Sa programang “Gikan sa Masa Para sa Masa,” mihatag og pagpasabot ang bise mayor, dungan sab sa pagpangasaba niya ngadto sa wa kasabot sa balaud.

"Paminaw mo ha, aron di mo mawala sa passing di mo mahiubos. Ug masuko mo i-pwesto inyong kahiubos. Kanang trisiboat, tsisikad, tricycle na way rehistro bawal gyud na. Karon, maski rehistrado nang trisiboat, ug dawaton, di na sila magamit og national highway kay kanang national highway it's intended for fast moving vehicles," ni Duterte.

Gidugang sa bise mayor nga kung ang panawagan sa uban paagion na lamang sa dalan ang mga payong-payong, apilon na lamang sab og paagi bisan ang mga kariton.

"Karon og gusto mo inyong paagion ang mga payong-payong, trisibat, okey diha i-agi hasta mga kariton. Kay nganong mohatag man tag ispesyal nga pribiliheyo ninyo," batbat sa bise mayor.

Dili sab pabor si Duterte nga perme na lamang ginahimo nga hinungdan sa uban mao ang kapobrehon mao nga anaa sila sa sama niini nga trabaho.

Alang sa bise mayor, nasabtan niya ang kalisud sa kahimtang sa kinabuhi, apan gikinahanglan sab nga huna-hunaon sa uban ang balaud nga angayang ipatuman.

"Unsa ang pasangil? Kapobrehon. Di tanan rason sa kinabuhi kana, di tanan pobre pagbigyan. Anaa ang balaud nga angay tumanon," pintok nga pahayag sa bise mayor.

Gibalak-an sa edarang Duterte nga daghang disgrasya na ang nahitabo sa dalan, diin sagad nalambigit mga payong-payong, nga suma niya mga drayber niini menor-de-edad.

"Una pasudlon mo diha sa highway mokalit lang mo'g U-turn. Wala mo moagi og eksaminasyon sa paggamit og dalan. Basta lang makakita mog dalan sulod mo, abi ninyo og pwede na," sulti sa bise mayor. (Rhona O. Goc-ong)