SMI naipit sa away sa tribung B’laan

KIBLAWAN, Davao del Sur -- Aminado ang mayor nga naipit karon ang Sagittarius Mines Inc. (SMI) sa away tali sa mga mag-partidos nga sakop sa tribong B'laan.

"Usa ka Pangayaw (away sa mga B'laan) ang nahitabong pag-atake sa mga kawani sa SMI aron panimaslan ang kompanya sa bikil sa ilang tribo," sumala ni Mayor Marivic Caminero-Diamante.

Gumikan niini, suma sa mayor, naipit karon ang kompanya sa SMI nga miresulta sa pagkamatay sa pipila ka mga kinabuhi nga naglihok palibot sa Davao del Sur, South Cotabato ug Sultan Kudarat.

Si Rita Dialang, igsuon sa tulo ka gitudlong suspek, nagbutyag nga nag-sakripisyo ang iyang mga igsuon aron protektahan ang yutang kabilin nga maoy ilang panginabuhian.

Gitudlong suspek sa mga otoridad mao sila si Dagil, Batas ug Kitari Capion.

Sumala ni Dialang nga dakong supak ang iyang mga igsuon sa pagmina sa SMI, apan wala girespeto ang ilang katungod sa yutang kabilin.

Usa sa mga pamilyang B'laan nga nalambigit kaniadto mao ang pamilyang Saluli, kinsa duol sa SMI tungod kay nakasud og trabaho sa kompanya ang ilang kaparyentehan.

Matud ni Diamante nga pakyas ang pamilyang Capion nga makasud sa kompanya sa SMI mao nga dunay Pangayaw.

Si John Arnaldo, external communications manager, nagklaro nga walay gipaboran ang ilang kompanya sa paghatag og trabaho.

"SMI has always applied an open and fair selection process in hiring its employees, contractors and agency workers," ni Arnaldo sa SuperBalita.

Bisan si Diamante, nagkanayon nga dili tanang sakop sa tribo makasud sa SMI tungod kay ang uban kanila walay edukasyon.

Si Arnaldo nagklaro hinuon nga dili makabalda sa ilang tumong ang mga bayolenteng istilo nga gihimo karon sa mga B'laan.

Sa pikas bahin, si Senior Inspector Francis Sonza, provincial director sa Criminal Investigation and Detection Group sa Davao del Sur, nagkanayon nga andam silang dakpon ang mga B'laan nga responsable sa sagunsong pagpangatake sa mga utlanang bahin sa probinsya sa Davao del Sur, South Cotabato ug Sultan Kudarat.

Matud ni Sonza, hayan kaalyado sa magsuong Capion ang mga rebeldeng New People's Army mao nga naglisud sila pagsaka sa bukid.

Ang National Democratic Front sa ilang bahin nagkanayon nga epektibong lakang batok SMI ang gihimo sa tribung B'laan.

Gidason sa NDF nga angayan lamang nga apilon sa mga armadong B'laan ang kapulisan ug militar sanglit nahimo silang instrumento sa operasyon sa SMI nga makasugod sa ilang mina karong tuig 2016.