1 patay, 80 balay naugdaw

DAVAO CITY -- Usa ka lalaki ang namatay sa dakong sunog nga milamoy sa commercial building ug panimalay sa otsenta ka pamilya alas 8:30 sa gabii niadtong Dominggo.

Ang sunog nahitabo didto sa Nazareno Street, Barangay Central, Mati City, Davao Oriental.

Base sa report nga nadawat ni Police Senior Inspector Gretchin Cinco, deputy spokesperson sa Police Regional Office-Davao, nagsugod ang kalayo sa Don-Don Repair and Electronic Services.

Sa maong patigayon, nakaplagan ang patay nga lawas ni Leonzo Areza, hamtong, minyo, driver ug caretaker sa Don-Don Repair and Electronic Services, nagpuyo sa Sitio Canipa, Barangay Don Enrique Lopez, Mati City.

Sa inisyal nga imbestigasyon sa Bureau of Fire Protection (BFP), gidudahan nga nagsugod ang kalayo sa wa nabantayan nga kandila sud sa electronic services.

Dali kaayong mikatay ang kalayo sa maong gambalay diin nahimutang ang Christian Learning School lakip na ang balay ni Sun.Star Davao Correspondent Ben Tesiorna.

Si Tesiorna nagbutyag sa SuperBalita nga maayong pagkaugdaw sa ilang balay diin nagpuyo ang iyang mga ginikanan.

"As of noon, 80 houses ang reported nga nasunog during sa among meeting karong hapon," suma ni Chief Inspector Dominador Cruda IV, hepe sa Mati City Police Office, dihang gitawgan sa SuperBalita kagahapon.

Nagduda ang mga silingan nga hubog ang biktimang si Areza dihang natulog sa electronics services mao nga gibasol siya sa mga apektadong pamilya.

Ang mga nasunogan nagyawyaw sab tungod kay dugay nakaresponde ang mga bombero kay nahutdan sila og tubig kay gigamit sa sinabligay og tubig sa kapistahan ni San Juan Bautista.

"Walay kamatuoran ang maong report, pasangil lang na," dugang ni Cruda.

Ang mga apektadong pamilya gipahiluna na karon sa evacuation center sa Pelaez Activity Center, City Hall Compound, Mati City.

Ang danyos sa sunog gibana-bana nga mikabat sa P20-milyones base sa inisyal nga report sa BFP.