2,447 kaso sa dengue natala ning tuiga

MISAKA og 108 porsiyento ang kaso sa dengue dinhi sa siyudad sa Davao sa unang unom ka bulan karon nga tuig kon itandi sa niadtong 2011.

Giangkon ni Dr. Abdullah B. Dumama, regional director sa Department of Health (DOH)-Davao, nga usa ka kaso lamang sa dengue nga ilang matala, maalarma na sila tungod kay posible nga mokatag kini.

"The other day, the secretary called me and asking kung ano na ang sitwasyon ng dengue dito, and we can say it’s increasing talaga, pero there is no need to alarm or declare an outbreak kasi the department is doing its part," ni Dr. Dumama atol sa Kapehan sa Dabaw sa SM City, Lunes.

Sa rekord as June 15, 2012, dinhi sa siyudad, mitala og 2,447 ka kaso, kini mas taas sa 1,175 niadtong 2011 sa samang period.

Anaa sab sa 90% ang usbaw sa pagkamatay sa mga biktima, nga miabot og 19, as taas sa 10 niadtong 2011 sa susamang panahon.

Kung hisgutan ang rehiyon, ang kaso anaa sa 3,000 ang ihap, kini 31% nga taas itandi sa 2,291 ka kaso sa nakalabay nga tuig.

Miabot sab og 27 ang namatay tungod sa sakit, o 93% nga usbaw.

Dinhi sa dakbayan, gikonsiderang hot sport areas sa dengue mao ang Talomo North, Talomo South, Buhangin, Bunawan ug Agdao, samtang sa probinsiya kini ang Maragusan sa Compostela Valley Province.

Gibutyag ni Dumama nga ang paspas nga pagsaka sa ihap sa naigo sa dengue tungod sab sa pausab-usab nga panahon, diin ang mga lamok nga nagdala sa strain sa dengue di na sa limpyong tubig nagapundo apan lakip na sa kanal.

Gipahimangnuan sa opisyal ang publiko nga way laing simple ug epektibong pangontra sa lamok, kundili ang paglimpyo sa palibot.

Kabahin sa lakang nga gihimo sa DOH mao ang pagmugna og Dengue Information Campaign, anaa sab sa pag-deploy sa regional Dengue teams aron maoy mo-imbestiga, mo-validate o mosubay sa area nga may natalang kaso sa dengue.

Gihimo sab sa ahensiya ang indoor residual spraying kaabag ang Davao City Tropical Team, pagpanghatag nila og insecticides sama sa treated nga kurtina, mosket lakip na OL-trap.

Nanghatag sab sila og ABKD posters nga gi-translate sa lokal nga dayalekto aron mapasabot unsa ang angay hinumduman sa sakit.

Pipila sa simtomas sa dengue mao ang hilanat, pagpanakit sa joints, panakit sa tiyan, rashes. (Rhona O. Goc-ong)