Detachment gipabuthan

COTABATO CITY -- Gipabuthan sa mga miyembro sa Bangsamoro Islamic Freedom Fighters (BIFF) ang detachment sa militar alas 7:30 sa gabii niadtong Sabado.

Gibutyag ni 6th Infantry Division Public Affairs chief Colonel Prudencio Asto nga gibana-banang 20 ka mga sakop sa BIFF ang nasiplatan sa mga sakop sa 45th Infantry Battalion sa Philippine Army didto sa Buayan Hill, Sitio Kyamco, Barangay Maitumaig, Datu Unsay.

Mga rebelde nagpabuto sa ilang mga armas tumong sa posisyon sa militar sa Hill 224, Barangay Kambingi, Datu Saudi Ampatuan.

Hinuon, gitin-aw ni Asto nga walay nasamdan sa bahin sa mga sundalo sa maong pagpanghasi sa mga rebelde.

Kahinumdoman nga niadtong Huwebes sa miaging semana, usa ka miyembro sa Bangsamoro Islamic Freedom Movement (BIFM) nga naila nga si Mohammad "Zul" Macmod, 18, ulitawo ang napatay sa diha nga gipusil sa mga armadong kalalakin-an duol sa ilang outpost sa Camp Omar.

Gipasanginlan ni BIFM Spokesman Abu Misry Mama nga mga sundalo ang mipusil patay sa biktima.

Apan gipanghimakak kini ni 1st Mechanized Infantry Light Armor Brigade Commander Colonel Mayoralgo Dela Cruz pinaagi sa pag-ingon nga dili mga sundalo ang nagpatay kang Macmod apan laing grupo sa mga rebelde.

Sa kasamtangan, gipatuman sa kasundalohan ang hugtanon nga pagbantay sa ilang posisyon kay basin kon isurprisa silang sulongon na sab sa mga rebelde. (Edgardo Fuerzas)