Mayor Sara gipahunong dakop sa payong-payong

HAYAHAY ang pamati karon sa mga payong-payong, trisiboat ug trisikad drivers nga nagbiyahian sa national highway tungod kay gipahunong ang pagpanakop kanila ni Mayor Sara Duterte-Carpio dinhi sa siyudad sa Davao.

"Sir, pwede ta mag-moratorium pagdakop sa mga payong-payong bisan one month lang? Mangita mi solution sa problema, kung di masulbad in one month, balik mo panakop sa ila," hangyo sa mayor kang Davao City Police Office Director Ronald dela Rosa pinaagi sa tawag sa telepono kagahapon.

Si Duterte-Carpio nanawag sa maong opisyal atubangan sa mga tigbalita atol sa iyang senimanang press briefing sa City Hall.

"Effective today, Sir, ang moratorium," pahibalo sa mayor ngadto sa hepe sa kapulisan sa siyudad nga maoy nanguna sa pagsikop sa mga payong-payong drivers sukad pa niadtong miaging semana.

Buot sa mayor nga mahunong ang pagsikop samtang hisgutan nila ang solusyon sa operasyon sa mga payong-payong, trisiboat, traysikad ug E-trike nga kanunay mosud sa nag-unang kadalanan sa siyudad.

"I-legalize ang ilang operation. After ma-legalize sila, then if they will violate, that's the time nga dakpon sila," pahayag sa mayor dihang gipangutana kon unsa ang solusyon nga iyang nahunahunaan.

Nagsugod ang kapulisan pagdakop sa mga payong-payong human gisugyot nga sikupon sila pinaagi sa programang “Gikan sa Masa, Para sa Masa” ni Vice Mayor Rodrigo Duterte duha na ka Dominggo ang milabay.

Dili pabor ang bise mayor sa katarungan nga misud sila sa maong trabaho tungod sa kapobrehon.

"Unsa ang pasangil? Kapobrehon? Di tanan rason sa kinabuhi kana, di tanan pobre pagbigyan. Anaa ang balaud nga angay tumanon," pintok nga pahayag sa bise mayor.

Sugod ning adlawa, suma sa mayor, ilang sugdan ang paghisgut sa maayong solusyon sa suliran sa payong-payong uban sa mga ahensiya sa gobyerno nga dunay jurisdiction sa regulasyon sa mga payong-payong. (Alger P. Dura)