Sibilyan ug sundalo nagpatay sa babaye

USA ka lalaki ang namatay samtang usa ka sundalo ang naangol human nagkaaway sila tungod kay nag-ilog sa usa ka babaye alas 8:30 sa gabii niadtong Dominggo.

Ang insidente nahitabo didto sa # 117 Fatima Village, Barangay 19-B Poblacion, siyudad sa Davao.

Namatay mao si Ferdinand Cabong, 43, minyo, nagpuyo sa Barrio Obrero, ning siyudad.

Si Cabong namatay tungod sa daghang samad pinusilan sa iyang lawas.

Naangol tungod sa mga samad dinunggaban si Tristan Bongac Mateo, 30, sakop 9th Infantry Division sa Philippine Army ug nagpuyo sa Dau Street, Bangkal, Barangay Talomo Proper, ning dakbayan.

Base sa blotter sa San Pedro Police Station, nasayran nga nakadungog og sagunsong buto sa armas si Rolando Sarosos, 51, nagpuyo sa ground floor nga bahin sa balay nga gipuy-an ni Catherine Ganal, 28, dalaga sa # 117, Fatima Village.

Gisaka ni Sarosos aron berepikahon ug didto iyang nakita si Mateo nga nagkadugo ug nanagayo og tabang kaniya.

Kauban ang iyang mga silingan, dali nilang gidala si Mateo sa Davao Medical School Foundation Hospital.

Narekober sa mga doktor gikan kang Mateo ang usa ka Super .38 caliber pistol nga dunay serial number 64260A lakip na ang duha ka mga magazine ug unom ka mga buhing bala nga anaa karon sa kustodiya sa San Pedro.

Sa dihang nakauli na si Sarosos sa ilang panimalay gikan sa balay tambalanan, nakit-an niya si Cabong nga nagkadugo og nangayog tabang kaniya.

Dali nilang gidala sa Southern Philippines Medical Center apan gideklara nga dead on arrival ni Dr. Joseph Millanes tungod sa mga samad pinusilan sa iyang lawas.

Nasayran nga kanhing uyab ni Ganal si Cabong samtang bag-o niyang uyab ang sundalong si Mateo.

Nagkaabot ang duha sa balay sa dalaga ug didto nagkalalis.

Gidunggab ni Cabong si Mateo pero mibalos pagpusil ang sundalo kang Cabong.

Padayon pang ginaobserbahan ni Dr. Ferdinand Malubay ang kahimtang karon sa maong sundalo. (Blue Cordero)