Bay gikawatan

PANABO CITY -- Mokabat sa P71 mil ang kinatibuk-ang kantidad sa mga kabtangan ang natangag sa balay nga giransak alas 4 sa hapon niadtong Lunes.

Si Dante Danilo Dacumos, 47, minyo, molupyo sa 7233, Duterte Street, National Highway, Barangay San Francisco, Panabo City maoy mipahibawo sa Panabo City Police Station sa maong hitabo.

Si Dacumos mismo ang nakadiskobre nga balay sa igsuon niyang babaye si Gladys, 42, minyo, ang gikawatan.

Nakuha gikan sa balay mao ang usa ka Sony Portable Play Station nga tag P4 mil, usa ka Sony digital camera nga tag P7 mil, usa ka camera charger nga tag P2 mil, tulo ka relo nga nagkantidad og P18 mil, jewelry box nga dunay sulod nga mga alahas nga kantidad og P20 mil ug kwarta nga P20 mil.

Nasayran sa imbestigasyon sa kapulisan nga ang inahan lang sa biktima nga nag-edad og 73 anyos ang mabilin sa balay sa buntag. Samtang nasayran sab nga di kinural ang palibot sa balay.

Sayon ra kaayong nakasulod ang mga kawatan, sanglit walay timailhan nga naglisud sa pagsulod sa balay.

Mihimo na og lakang ang kapulisan sa Panabo PNP aron nga masulbad ang maong hitabo. (Teddy Cabana)