Opisina sa kooperatiba sa PRO-Davao giransak

GIRANSAK sa mga wala mailhing kawatan ang opisina sa kooperatiba sa Police Regional Office sa Davao alas 7:30 sa gabii niadtong Lunes sud sa Camp Catitipan, Buhangin, siyudad sa Davao.

Nadiskobrehan ang kawat ni Teddy Ruaya, 33, minyo, utility man sa maong opisina sa dihang misulod na unta siya aron motrabaho.

Sa imbestigasyon nga gihimo sa Buhangin Police Station, nasayran nga ang mga kawatan unang misulod sa ground floor sa maong gambalay pinaagi sa pagguba sa bakal grills sa bintana.

Human niini, midiretso ang mga suspetsado sa ikaduhang andana ug misulod sa administration office pinaagi sa pagguba sa kisame sa comfort room.

Gipanglimas sa mga kawatan ang mga gamit sud sa maong opisina sama sa usa ka projector nga nagkantidad og P83,000; usa ka laptop nga kantidad og P25,000: usa ka Sony videocam kantidad P40,000 ug kuwartang nga P3,000.

Padayon pa ang gihimong imbestigasyon sa kapulisan aron mailhan kung kinsa ang mga responsable nga yano rang misulod sa kampo sa kapulisan ug nangawat. (Blue Cordero)