Gipikhan samtang nagmotor
-A A +ANi Alger Dura
Wednesday, June 27, 2012
USA ka cable collector/technician ang namatay human gipusil sa wa mailhing mamumuno samtang nagsakay sa iyang motorsiklo alas 5:30 sa hapon niadtong Martes.
Nahitabo ang pagpamusil didto sa Purok 2, Matina Gravahan, Barangay Matina Crossing, siyudad sa Davao.
Ang biktima mao si Rogelio Lancian, 61, lumad nga taga Salingkomot, Baganga, Davao Oriental ug nagpuyo sa Purok 2, Matina Gravahan.
Base sa spot report sa Talomo Police Station, ang biktima gipikhan sa mamumuno makatulo ka higayon gamit ang wa matino nga kalibre sa armas.
Si Lancian giingon nga nagsakay sa iyang motorsiklo dihang gipusil sa mamumuno nga naglakaw lamang sa lugar.
Ang biktima naigo sa iyang tuong mata ug walang abaga nga miresulta sa iyang kamatayon.
Ang mga nakasaksi nagbutyag sa kapulisan nga daling misibat ang mamumuno sakay sa usa ka motorsiklo nga nagpaabot kaniya sa unahan nga bahin.
Ang biktima gidala karon sa Collado Funeral Homes samtang gisubay sa kapulisan ang motibo sa maong krimen. (Alger Dura)
Gipatik sa mantalaang SuperBalita Davao Hunyo 28, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
