Negusiyante nailad, P1 milyon gitangag sa 'budol' gang

USA ka negusyante ang nailad sa “budol-budol” gang alas 2 sa hapon didto sa Agton Street, Toril Poblacion, siyudad sa Davao.

Ang biktima mao si Editha Sumilig Mangas, 53, minyo, nagpuyo sa San Roque, Barangay Daliao, siyudad sa Davao.

Si Mangas midangop sa Toril Police Station human siya nailad sa unom ka mga tawo nga nagtakubang buyer og abono.

Ang biktima nagbutyag nga samtang nagtindog siya sa Agton Street, usa ka babaye ang miduol kaniya dayon nangutana kon asa siya makapalit og abono.

Pipila ka minuto ang milabay, miduol sab kanila ang duha ka tawo nga nagpailang magtiayon kinsa miingon nga ang abono makita sa Crossing Bayabas.

Ang duha misakay dayon og traysikol ug sa ilang pagbalik kauban na ang duha ka tawo nga nagpailang drayber ug usa ka babaye.

Gipangutana ang biktima kon duna ba siyay kuwarta ug iyang gitubag nga duna tungod kay usa siya ka negusyante.

Gipakuyog sa biktima ang mga mangingilad sa balay aron ipamatuod nga may kuwarta siya base sa bank book, apan miingon ang mga mangingilad nga peke ang bank book hinungdan nga miadto sila sa Metro Bank.

Ang biktima gipasakay sa sakyanan diin gihatag kaniya ang dakong bag nga dunay daghang kuwarta, apan gipabilin sab sa biktima ang iyang gi-withdraw nga kwarta sa banko nga nagkantidad og P900-mil lakip ang iyang alahas nga nagkantidad og P200-mil.

Pag-abot nila sa GTH, suma sa biktima, gipakanaog siya sa mga mangingilad ug giingnan nga hulaton lang ang manager sa supplier og abono sa ilang balay.

Sa pagsusi sa biktima sa bag, pulos mga ginunting nga papel nga gibilin kaniya sa mga sakop sa budol-budol gang. (Alger Dura)