Radio Mindanao Network Davao welgahan na sa mga empleyado

ANG mga sakop sa Radio Mindanao Network Davao Employees Union (RDEU) nagbahad nga di na madungog sa kahanginan ang ilang sibyahanan kon ilang ilusad ang dakong welga human napakyas ang kompanya pagtuman sa ilang Collective Bargaining Agreement (CBA) nga gipirmahan niadtong Nobyembre 2011.

Mga empleyado sa Radio Mindanao Network (RMN) mibalik sa ilang picket rally kagahapong adlawa atubangan sa ilang istasyon sa dalang Bonifacio kanto Anda, ning siyudad sa Davao.

"Nag-rally mi karong udto kay gibalewala man nila ang among gipangayo sa kompanya," pahayag ni Rey Fabe, presidente sa RDEU dihang gihinabi sa Sun.Star Superbalita kagahapon.

Si Fabe nagkanayon nga ilang gilusad ang rally kagahapon human natapos ang 22 ka adlaw nga tagal subay sa ilang giduso nga Notice of Strike sa National Conciliation and Mediation Board (NCMB) Davao Region.

"Niadtong November 2011 naa mi gipirmahan nga ipatuman nila ang CBA. Gipaabot namo nga ila kining ipatuman, pero ila mang gibalewala mao nga nag-rally na sab mi," sulti ni Fabe.

Siya nagsulti nga wa miatubang kanila ang mga opisyales sa kompanya sa Main Office, apan ang miatubang kanila mao lamang ang area manager ug station manager niadtong Martes didto sa NCMB.

"Nagpakita lang sila didto ug miingon nga willing silang hisgutan ang problema. Ang buot nilang ipasabot nga mobalik na sab mi sa uno? Di ni maayo!" sulti ni Fabe.

Giingon ni Fabe nga nabalaka sila karon tungod kay dunay lima na ka mga empleyado sa RMN Manila nga giharas, gitaktak sa kompanya tungod kay miapil sa lihuk protesta.

"Ang among gikahadlokan nga basin gamiton ni Eric Canoy (tag-iya sa RMN) ang iyang impluwensiya sa administrasyon ni Presidente Noynoy Aquino kay under siya sa Malakanyang isip chairman sa IBC 13," pahayag ni Fabe.

Gipasabot niya nga mamahimong mo-interbenar si Aquino tungod kay usa sa mga polisiya sa pangulo nga way mahitabong protesta sa mga kompanya aron di madaut sa langyaw nga kanasuran.

"Kung mahitabo nga naay welga, posibleng mag-order ang presidente sa secretary sa Department of Labor and Employment (Dole) nga i-take over ang kaso, mag-order ang Dole og assumption of jurisdiction," sulti ni Fabe.

Nabalaka sila nga kon ipamugos nila ang welga, mataktak sila sa trabaho.

"Bisan pa man niini, amo kining himuon aron ipakita sa mga tawo nga di lang mi kutob sa pagyawyaw sa radyo, pero mahimo sab namo ang pagwelga sa among istasyon," pasalig ni Fabe.

Siya nagkanayon nga igo lang nilang gipangayo ang dugang usbaw sa suholan ug libreng bugas matag buwan.

"Base sa among kuwentada, mikita ang RMN (dxDC ug I-FM) og P24-million matag bulan. Ang among gipangayo sa ilaha P99-thousand lang para bahin-bahinon sa mga empleyado. Nganong di man nila mahatag?" panapos ni Fabe.

Sa pagsuwat ning balita, wa pa makuha sa Superbalita ang pahayag sa management sa RMN. (Alger P. Dura)