Consultant sa Armm governor gipatay
-A A +AThursday, June 28, 2012
COTABATO CITY - Usa ka consultant ni Autonomous Region in Muslim Mindanao (Armm) officer-in-charge Governor Mujiv Hataman gipusil patay alas 5:40 sa hapon niadtong Miyerkules.
Ang gipatay mao si Rafael Raffy Nabre, 45, minyo, Secretary General sa Anak Pawis Mindanao ug consultant ni Governor Hataman sa Armm.
Gikanayon ni Cotabato City Police Office director Senior Superintendent Danny Reyes nga gipusil si Nabre sa riding in tandem samtang sakay sa iyang motorsiklo.
Sumala pa nga pauli na unta ang biktima sa iyang balay sa San Pablo Village gikan sa iyang trabaho sa buhatan ni Hataman.
Apan pag-abot niya sa Yapse Street sa Happy Homes Subdivision, kalit siyang gisundan sa duha ka wala mailhing lalaki nga sakay og motorsiklo ug gipusil gamit ang kalibre .45 nga pistola.
Human makita nga patay na ang biktima, ang mga mamumuno daling misibat paingon sa wala matino nga direksiyon.
Daling gitabang ang biktima ug gidala sa nagrespondeng kapulisan sa Cotabato Regional and Medical Center. Apan gideklara siya sa nag-atiman nga doktor sa maong ospital nga dead on arrival.
Nakaangkon og samad pinusilan sa ulo, dughan ug tangkugo si Nabre nga maoy hinungdan sa iyang kamatayon.
Gikasubo ni Hataman ang kamatayon sa iyang consultant ug suod nga higala nga dugay na niya nga kauban sa Anak Pawis Mindanao.
Hangtud karon blangko pa ang kapulisan sa motibo sa pagpatay sa biktima ug padayon pa ang ilang imbestigasyon. (Edgardo Fuerzas)
Gipatik sa mantalaang SuperBalita Davao Hunyo 29, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
