Pulis aduna nay artist sketch sa tulisan

DUNA nay artist sketch ang kapulisan sa suspetsado nga mitulis ug nagmolestiya sa dalaga niadtong Martes sa gabii didto Lerra Homes, Interior Pelayo, Duterte Street, siyudad sa Davao.

Ang artist sketch gibase sa gihulagway sa biktima nga si Enjielyn, 22, lumad nga taga Butuan City ug nagpuyo sa nahisgutang lugar.

Kahinumdoman nga alas 8:20 sa gabii niadtong Martes, nagbaktas ang biktima sa dalang Duterte. Apan giduol siya sa suspetsado nga nagpatabang kon asa ang gipuy-an sa iyang igsuon nga lalaki sa Lerra Homes, Interior Pelayo sa dalang Duterte.

Tuod man giubanan siya sa biktima ug gitudloan sa maong kuwarto.

Sa dihang mosulod na ang biktima, gitukmod siya sa suspetsado sa sulod nga bahin ug gihiktan ang mga kamot ug tiil.

Wala pa makontento, gibutangan pa og masking tape ang baba sa biktima.

Gipanglimas sa lalaki ang laptop sa biktima nga nagkantidad og P38,000, monitor ug keyboard sa computer nga nagkantidad og P6,000, usa ka mahalong relo nga nagkantidad og P12,000, mga sinsilyo nga miabot og P4,000, usa ka shoulder bag ug nagkadaiyang klase sa sinina nga kantidad og P15,000 ug kuwarta nga mobalor sa P120,000.

Gimolestiya pa sa suspetsado ang biktima pinaagi sa paghimas sa nagkadaiyang bahin sa lawas una misibat.

Padayon pa nga gipangita sa kapulisan sa San Pedro Police Station ang suspetsado. (Blue Cordero)