'Pulis' kidnaper naaresto

USA ka pulis nga nalambigit sa kidnap for ransom ang nasikop sa mga sakop sa National Bureau of Investigation (NBI) Davao Region niadtong Miyerkules.

Ang suspek mao si Police Officer 1 Mahkael Oliver Dicay, hamtong ang pangidaron, sakop sa First Maneuver Company nga nakabase sa Cateel, Davao Oriental ilawom sa 11th Regional Public Safety Battalion.

Si Dicay nasikop alas 5 pasado sa hapon gawas sa pawnshop sa Barangay Matina Crossing, siyudad sa Davao.

Sa maong dapit gikuha ang salapi sa iyang biktimang si Vanessa Motus, 24, dalaga, medical representative sa SV More Group of Companies/Pharma, Nutria N.A. Inc., lumad nga taga Iloilo ug dinhi nagtrabaho sa siyudad.

Nahitabo ang pagpangdagit samtang nagparada ang biktima sa iyang sakyanan sa dalang Malvar, ning siyudad.

"Bigla lang siyang dumating sa passenger's seat at tinutukan niya ako ng baril. Sabi niya, ako nalang ang magbibigay ng tip sa car watch boy at sundin mo ang aking sasabihin," pahayag ni Motus sa pakighinabi sa dxRA Radyo Arangkada.

Ang biktima nagkanayon nga gimandoan siya ni Dicay nga moadto sa Barangay Bago Aplaya.

"Hinalungkat niya ang aking bag, tiningnan niya kung may pera ako. Sinabihan ko siya na kung pera ang gusto niya, hahanapan ko ng paraan," sulti ni Motus.

Si Dicay giingon nga nagbahad pa sa biktima nga luguson ug patyon kon magpakita siya og dautang mga lihok.

"Nagmakaawa na ako sa kanya. Nag-umpisa kami sa 30 thousand, naging 50 thousand, at hanggang umabot kami sa 70 thousand pesos na ang ransom money," dugang ni Motus.

Si Motus nagsulti nga iyang gikuha ang pagsalig sa suspek mao nga gitugotan siyang manawag sa ilang kompanya aron makuha ang salapi.

"Nung hinulog na ang pera sa panwshop, na-convince ko siyang dalhin ang cellphone at susi ng aking sasakyan. At nagtanong sila (mga kasamahan ko) sa text kung ano ang suot ng suspek. At ilang minuto hinuli na siya ng mga NBI," saysay ni Motus.

Si Dicay, sa laing bahin, nagbutyag nga extortion lamang ang iyang gihimo sa biktima ug wa siyay planong dagiton ang dalaga.

"Dahil sa matinding pangangailganan nagawa ko pong manghingi sa kanya ng pera," sulti ni Dicay dihang gihinabi sa Sun.Star Superbalita.

"May kasamahan silang humingi ng tulong sa amin kaya isinagawa namin ang operation. Walang puwang sa gobyerno ang ganitong klaseng police," pahayag ni NBI director Max Salvador.

Nakuha gikan sa suspek ang toy gun nga iyang gigamit sa krimen, mga identification cards, ug salapi nga P70-mil.

Nasayran nga dunay lain pang duha ka mga biktima ang suspek, apan wa na gibutyag ang pangalan sanglit mga prominente silang negusyante sa siyudad.

Si Police Senior Superintendent Florencio Ortilla, commanding officer sa 11th Regional Public Safety Battalion, nagbutyag nga iya nang gipasakaan og kasong administratibo ug ipataktak niya sa serbisyo ang suspek.

"Based on records, absent without leave (Awol) si Dicay as of June 11. Ina-abandon niya ang kanyang trabaho bilang rifle man kaya pina-releive ko rin ang kanyang mga immediate superiors," suli ni Ortilla.

Sa pagsuwat ning balita, gihikay na ang kasong kidnap for ransom batok sa suspek. (Alger P. Dura)