Blood Pressure Gang miatake

PANABO CITY - Usa ka 67 anyos nga tigulang kinsa nagpasusi sa iyang blood pressure ang gitulis sa duha ka mga lalaki alas 10:30 sa buntag niadtong Huwebes didto sa Barangay Cagangohan.

Si Senior Police Officer 1 Adonis Estenzo, imbestigador sa Panabo City Police Station (PCPS) mi-ila sa biktima nga si Alfredo Mante, minyo, molupyo sa Purok Tambis, Barangay Cagangohan sa maong siyudad.

Gitug-an ni Mante ngadto sa kapulisan nga samtang naa siya sa gawas sa iyang balay, duha ka lalaki nga sakay og motorsiklo nga XRM, kolor itom, mihunong sa atubangan ug mihanyag nga mohimo og blood pressure kaniya.

Dihang naa na sa sulod, usa sa mga suspetsado ang milanit og kutsilyo ug mition sa liog sa biktima dayong mideklarang hold-up.

Sanglit nahadlok, dali nga mitunol sa iyang bulawang sing-sing nga nagkantidad og P8 mil ang biktima. Dali sab nga misibat ang mga suspetsado palayo sa maong dapit.

Gihulagway ni Mante nga usa sa duha ka mga suspetsado dunay gitas-on nga 5'7", pution, nagsul-ob og itom nga jacket samtang ang laing usa gibanabana nga 5'5" ang gitas-on ug kasarangan ang panglawas.

Ang kapulisan mihimo na og lakang aron nga mailhan ang mga suspetsadong tulisan. (Teddy Cabana)