'Hazard pay' wa gihatag sa gobyerno, health workers mitiyabaw

DAVAO CITY - Mitiyabaw karon ang mga public health workers sa tibuok nasud tungod kay wa mahatag kanila ang ilang benepisyo sama sa hazard pay ning tuiga.

Ang National Department of Health Employees Association (Nadea) maoy gipasakopan sa mayorya sa 33, 295 ka mga health workers sa nasud kinsa giputlan sa ilang benepisyo sukad pa niadtong Enero 2012.

"We are simply asking for the government to continue implementing the law," suma ni Fernado Depano, national president sa Nadea.

Ang maong allowance, gibase sa 25 porsiyento sa binuwan nga sweldo sa health workers nga nagdawatan lamang og salary grade 19 paubos ug singko porsiyento alang ngadto sa mga dunay salary grade 20 pataas, subay sa mandato sa Republic Act 7305 kun Magna Carta for Public Health Workers.

Aron mapugos ang gobyerno nga mahatag kanila ang maong benepisyo, naglusad og lihok protesta ang mga empleyado sa Department of Health (DOH) Region 11 niadtong Lunes ug Huwebes.

"Nag-picket rally mi atubangan sa DOH office alas 12 sa udto last Monday. Ug naa mi candle lighting Huwebes sa gabii," sigon ni Nadea Davao Chapter President Jonathan Placido sa Sun.Star Davao Superbalita.

Si Placido nagkanayon nga hiniusa ang ilang mga lihok protesta sa tibuok nasud aron patalinghugan ang ilang suwat nga gipadangat kang DOH Secretary Enrique Ona.

"Bisan nakadawat mi sa among hazard pay sa bulan sa Mayo dinhi sa Davao region, pero amo ning gihimo ang protesta isip suporta sa uban nga region nga wala gyud makadawat sa ilang hazard pay," sulti ni Placido.

Nasayran nga ang maong lakang sa Nadea gisuportahan sa mga Regional Directors ug Hospital Chiefs mao nga naglaum sila nga aksiyon kini sa kalihim. (Alger P. Dura)