Tesda mohimo og Natcac

HUMAN nagmalampuson ang gihimong free assessment and certification program niadtong 2011, subli na sab nga ipatuman sa Technical Education and Skills Development Authority (Tesda) ang National TVET Competency Assessment and Certification (Natcac) Program karon nga tuig, alang ngadto sa industry workers, TVET trainers-assessors, ug mga Overseas Filipino Workers nga mipauli dinhi sa nasud.

Tumong sa programa nga mapalambo ang katakus ug abilidad sa mga empleyado.

Ang libre nga assessment and certification program himuon Hulyo 9-20, Agosto 20-31, ug Oktubre 15-26 ning tuiga.

Sa pahayag gikan Tesda–Davao Region, gibutyag nga target nila ang 4,680 beneficiaries sa rehiyon lamang.

Niadtong 2011, dunay 4,321 ka indibduwal ang nakapahimulos sa programa dinhi sa rehiyon.

Ang Natcac 2012 mag-cover sa mosunod nga key qualifications uban ang critical skills ug high industry demands sa sektor sa Automotive & Land Transport, Construction, Information & Communication Technology, Tourism, Metals & Engineering, Heating, Ventilation & Airconditioning, and Agricultural & Food Processing.

Ang assessment activities himuon sa pinili nga Tesda-accredited competency assessment centers sa Davao City, Davao del Sur, Davao del Norte, Davao Oriental ug Compostela Valley.

Ang molampus nga kandidato, mahatagan og National Certificates (NCs) or Certificate of Competencies (COCs), nga mahimo nilang gamiton sa ilang pagpangaplay og trabaho sa lokal o abroad.

Ang interesado nga aplikante mamahimong mokuha og application form, lakip na listahan sa rekisitos gikan sa gi-identify nga assessment centers o sa Tesda Provincial Office sa dili pa himuon ang eksaminasyon.

Ang buhatan sa Tesda dinhi sa siyudad, anaa nahimutang sa J. Luna St, ning siyudad. (PR)