Gipatay sa nakamotor

PATAY ang usa ka lalaki human siya gipusil sa nag-inusarang mamumuno nga nagsakay og big bike nga motor alas 2:12 sa sayong kaadlawon kagahapon.

Nahitabo ang insidente didto sa gawas sa Ka Ores Bar sa Nova Tierra, Lanang, siyudad sa Davao.

Ang biktima naila lamang sa pangalang Justin, hamtong ang pangedaron, walay permanenteng address dinhi sa dakbayan sa Davao.

Gihulagway nga ang biktima nagsul-ob og itom nga short pants, puti nga t-shirt, itom nga kalo, payat ang panglawas ug gibanabana nga 5'4" to 5'5" ang gitas-on.

Sa spot report ni Senior Police Officer 3 Claudio Adormeo III sa Sasa Police Station, nasayran nga gipusil ang biktima sa mamumuno nga kinsa gihulagway sa mga nakakita nga nagsul-ob og pula nga t-shirt, maong nga pantalon, tabaon ang lawas ug dunay gitas-on nga 5'7".

Nakaangkon ang biktima og upat ka mga samad pinusilan sa nagkadaiyang bahin sa lawas sa wala pa matino nga kalibre sa armas.

Daling misibat ang mamumuno sakay sa usa ka kolor pula nga big bike nga motor padulong sa Panacan area.

Nakarekober sa kapulisan gikan sa nahitaboan ang pito ka mga basiyo, tulo ka mga buhing bala ug usa ka balines sa wala pa matinong kalibre sa armas.

Mga sakop sa kapulisan sa Sasa, padayon pa nga naghimo og lawom nga imbestigasyon kung unsa ang motibo sa pagpatay sa biktima. (Blue Cordero)