Pulis, napatay sa ambus gilubong na

DIGOS CITY - Gilubong na ang napatay sa ambus nga pulis kagahapong adlawa.

Usa ka necrological service ang gihalad ngadto kang Police Officer 2 (PO2) Rey Tonzo didto sa Davao del Sur Provincial Police Office (DDSPPO) nga gitambungan sa pamilya, kabanay ug mga higala ug kaubang pulis una gihimo ang santos nga misa.

Gihatagan sab og 21 ka gun salute ang pulis una gitumod ang iyang patay nga lawas sa lubnganan didto sa Digos City Memorial Park alas 12:00 sa udto.

Kahinumdoman nga si Tonzo ang nagmaneho sa patrol car sa Kiblawan Police Station niadtong Miyerkules sa milabay nga semana sa dihang gibanhigan sa mga armadong B'laan didto sa Barangay Kimlawis sa maong lungsod.

Apil nga namatay si retired Police Superintendent Villamendo Hectin, consultant sa Sagittarius Mines Inc.

Nasamdan sab niadtong higayona ang mga kaubanang pulis ni Tonzo nga sila si PO1 Gleen Beltran, SPO1 Wenefredo Senconiege, lakip na ang mga nirespondeng sakop sa Cafgu Active Auxiliary nga sila Templa ug Malanson ug Captain Datuting Gumbila sa Task Force Kitako.

Gitudlo nga grupo ni Dagil Capion ang namanhig sa mga pulis diin nausban pa upat ka adlaw ang nilabay nga gikasamad sab si PO1 Ulyjean Singcolan.

Sa kasamtangan, nagpadayon ang hugot nga pagbantay sa kapulisan ug militar sa Barangay Kimlawis sa tinguhang madakpan ang grupo ni Capion kinsa daan nang adunay orden de aresto tungod sa kasong murder.

Ang maong grupo nakig-away sab sa ilang kabanay human nga wa maapil sa grasya nga gitunol kanila sa SMI. (Orlando B. Dinoy)