Napugngan pag-takeover sa NEA sa Daneco

DAVAO DEL NORTE - Wala mahinayon ang pag-takeover sa mga opisyales sa National Electrification Administration (NEA) sa Davao del Norte Electric Coopertaive (Daneco) dala ang temporary restraining order (TRO) niadtong Sabado.

Sulod sa kapin sa lima ka oras, naglantugi ang duha ka kampo sulod sa Board Room sa Daneco office nga nahimutang sa Barangay East, Tagum City.

Gilantugian nila ang isyu sa 60 diyas nga TRO aron maresolba ang pagpapapha sa siyam ka mga board of directors sa Daneco sa sala ni Judge Helarion Clapiz Jr. sa Regional Trial Court branch 3 didto sa Nabunturan.

Dungan nga misulod sila NEA Deputy Administrator Ed Piamonte uban si NEA Project Supervisor Evangelito Estaca, kanhi Daneco board of directors Rodolfo Ang, Gervacio, Rolando Bugas, kanhi Daneco OIC General Manager Allan Laniba ug ang nagreklamo nga si Gregorio Ybañez.

Pugsanong misulod sila sa buhatan sa Daneco human gipangguba ang mga kadena nga nakalambod sa duha ka gate sa maong buhatan.

Tulo ka mga abogado ni Ybañez nga gipangulohan ni Atty. George Rapista, Jabines ug Albacite ang nagbitbit sa TRO.

Sanglit walay bisan usa ka board of director sa sulod sa Daneco office, giatubang sila ni kanhi 1st district Compostela Valley Representative Manuel “Way Kurat” Zamora isip tigpamaba ug consultant sa Daneco.

Iyang gipangita ang sherrif nga maoy mopatuman sa TRO.

Bisan tuod og walay sherrif gikan sa Court of Appeals, namugos gayud ang mga abogado ni Yba¤ez mao nga nakasulod sila sa board room diin nila gipahigayon ang sesyon uban sa mga sakop sa NEA lakip sila Laniba, Bugas, Gervacio, Estaca, Piamonte ug lain pang lima ka mga tawo gikan sa NEA.

Samtang nagpadayon ang sesyon sa mga nahisgutang opsiyal, miabot ang magsuong Uy nga sila Compostela Valley Governor Arturo Uy ug Tagum City Mayor Rey Uy nga naghangyo ngadto sa mga naglangkob sa nag-sesyon nga mohawa na sila sa sulod sa Daneco.

Katarungan sa managsuong Uy nga napailawom na ang Daneco sa Coopertaive Development Authority ug ang mando sa korte alang ngadto sa siyam ka mga board of directors.

Usa sa gikadismaya sa magsuong Uy mao nga ang mga taga NEA maoy nangulo uban sa mga abogado walay respeto sa mga opisyal sa lokal nga kagamhanan.

Alang nila, daw martial law ang gibuhat sa mga nahisgutan kay pugsanon nilang gisulod ang Daneco.

“Kamo bang taga NEA wala moy respeto, wala moy pananghid namong mga opisyal nga mosulod mo. Mo-takeover mo nga ang siyam ra man maoy gitumbok sa mando sa TRO nga dili na makahimo pa sa ilang trabaho? Wala man dinha nagsulti nga kamo nay mag-takeover,” sulti ni Mayor Uy.

Gibasehan nila nga illegal ang gibuhat sa mga abogado ni Ybañez tungod kay walay sherrif nga nag-implementar, suma sa gisaysay sa abogado ni Governor Uy nga si Atty. Ruel Peter Gonzaga.

Hinuon, walay duguong panghitabo sa pag-takeover sa taga NEA sa Daneco.

Managsuong Uy nagsulti nga ilang pugngan ang himuong take over kay ang Daneco napailawom na sa CDA.

Naglaraw sab silang mopasaka og kaso sa mga tawo nga pugsanong misulod sa maong buhatan. (Teddy Cabana)