Dalaga nagpusil sa ulo

MIDSAYAP, North Cotabato -- Patay ang usa ka dalaga human nga giingong nag-unay og pusil sa kaugalingon alas 5:30 sa hapon niadtong Lunes.

Ang biktima giila sa kapulisan nga si Arlene Hiponia, 21, ug molupyo sa Purok 4, Barangay Baliki, Midsayap.

Base sa nahipos nga taho gikan kang Midsayap chief of police Franklin Anito, nasayran nga masulob-on matud pa nga miuli sa balay si Hiponia gikan sa trabaho kinsa midiretso nga misulod sa iyang kuwarto.

Apan wala lang tagda sa mga miyembro sa pamilya sa pagtuo nga gikapoy lang ang biktima sa trabaho o kaha dunay gamay nga problema.

Apan pipila lang ka gutlo ang milabay, nakadungog na lang sila og masipa nga buto sa pusil sulod sa kuwarto sa biktima.

Sa dihang gisusi, ila na lang nakita nga naligo na ang dalaga sa kaugalingong dugo human gipusil ang ulo gamit ang .22 nga armas.

Nakuha sab sa duol sa patay nga lawas sa biktima ang suicide note nga nagkanayon, "Pait kaayo ang akong kahimtang ug dili nako kaagwanta."

Sa kasamtangan, nagpadayon ang imbestigasyon sa kapulisan aron maseguro nga walay foul play sa kamatayon sa dalaga. (Edgardo Fuerzas)