Kanhi traffic enforcer gitipi

TAGUM CITY -- Usa ka kanhi traffic enforcer ang gitusak-tusak og unom ka bala sa lawas ug namatay alas 6:30 sa gabii niadtong Lunes.

Ang biktima giila sa pangalang si Wilfredo "Willy" Derecho, 42, minyo, molupyo sa Sison Subdivision, Magugpo South, Tagum City.

Si Derecho gipusil didto sa dalang Sobrecary atbang sa Moto-R Trading samtang nagmaneho og Mitsubishi pick-up nga dunay plaka numero LGG 319.

Gikanayon nga ang biktima padulong na unta mopauli sa ilang balay gikan sa usa ka gidumalang hollow block shop.

Base sa nahipos nga kasayuran gikan sa Tagum City Police Station (TCPS), nasayran nga ang biktima gipusil sa angkas sa nagsakay og motorsiklo nga Suzuki Raider gamit ang kalibre .45 nga pistola.

Mga otoridad nakahipos og upat ka mga basiyo nga bala sa maong armas gikan sa nahitaboan.

Usa sa mga gilantaw nga motibo ug maoy giimbestigahan karon mao ang giingong love triangle.

Nasayran nga ang kanhi traffic enforcer sa siyudad sa Tagum bulag sa iyang asawa ug miipon na sa iyang kapuyo, kinsa maoy tag-iya sa pick-up nga gimaneho sa biktima sa dihang gipusil siya.

Hinuon, ang kapulisan sa Tagum City padayon pa sa ilang gihimong imbestigasyon sa hitabo. (Teddy Cabana)