Lalaking gisalbids gilabay sa kanal

DAVAO DEL NORTE -- Wala pay tagtungod ang mikuha sa patay'ng lawas sa usa ka lalaki nga giingong gisalbids ug gilabay sa primary canal sulod sa plantasyon sa saging sa Purok 5, Barangay Sampao, Kapalong.

Gikompirmar kagahapong adlawa ni Jun Escriba, tag-iya sa Escriba Funeral Homes sa Barangay Maniki, Kapalong, nga ang patay'ng lawas sa lalaki naa pa sa punerarya.

Nasayran nga napalgan ang biktima sa mga molupyo sa sagingan nga gipanag-iyahan ni Crizilda Beldua sa maong dapit nga dunay mga samad pinusilan sa nagkadaiyang bahin sa lawas.

Sa taho ni PO3 Julius Jeric Agayan, imbestigador sa Kapalong Municipal Police Station, nasayran nga ang lawas sa biktima giputos ug sako ug cellophane.

Nadunggan pa matud pa sa mga estambay sa maong dapit ang mga masipang mga buto gikan sa wala matinong kalibre sa armas alas 6:02 sa buntag niadtong Hulyo 2 ning bulana ug nakita na lang nilang nagbuy-od na sa dakong kanal ang biktima.

Mihimo na'g dugang pakisusi ang kapulisan aron masayran ang motibo ug mailhan ang mga mamumuno sa biktima. (Teddy Cabana)