Pekeng salaping papel na-withdraw sa ATM machine

DIGOS CITY -- Nangayo ug tabang sa kapulisan ang usa ka 27 anyos nga lalaki human nga naka-withdraw ug peke nga salapi gikan sa Automated Teller Machine (ATM) sa Banco De Oro (BDO).

Ang biktima nailhan nga si Niel Alegarbes, molupyo sa dalang Lopez Jaena Extension, human maka-withdraw ug peke nga usa ka libong papel nga kuwarta niadtong Martes.

Gisaysay ni Alegarbes ngadto sa kapulisan nga balor ug P4,500 ang iyang na-withdraw gikan sa ATM sa maong bangko.

Apan iyang nadiskobrehan nga ang usa sa upat ka tag-libo nga kuwartang papel peke diay.

Nasayran niya nga peke ang maong kuwarta human nga mibayad siya sa iyang gipalit sa Novo Department Store sa dakbayan sa Digos.

Daling gitaho sa biktima ang hitabo ngadto sa kapulisan ug dayong pahibalo sa bangko bahin niini.

Hinuon, sa dihang gihinabi sa SuperBalita ang usa ka cashier sa bangko, matud niya nga ila dayong giilisan ang maong salapi.

Kini human nga masuta sa tagdumala sa BDO pinaagi sa ilang closed circuit television camera nga sa ilang ATM machine na-withdraw ang peke nga salapi.

Nihimo na sab ang kapulisan ug imbestigasyon bahin sa hitabo. (Orlando B. Dinoy)