Seminar sa mga drayber kaupat na matag bulan

ANG lokal nga kagamhanan sa siyudad nagtakda nga mohimo ug seminar alang sa mga drayber sa Public Utility Vehicle (PUV) sud sa upat ka mga Biyernes sa Hulyo, nga magsugod karong Hulyo 6.

Si Joel Santos sa Davao City Traffic Management Center (TMC), sa paghinabi kaniya kagahapon, nagsulti nga di sama sa milabay nga bulan, ang seminar gihimo lang makaduha ka higayon. Ang lokal nga kagamhanan ning bulana nakahukom nga mohimo niini ug upat ka mga Biyernes sa bulan.

"Diyan tinuturo ang lahat ng mga bagay na dapat malaman ng mga drivers," matud ni Santos.

Dugang ni Santos nga ang mga butang nga hisgutan sa seminar naglakip sa sumbanan sa kalsada, multa ug mga silot, ug traffic rules sa kinatibuk-an, ug uban pa.

Ang seminar gipasiugdahan sa lokal nga kagamhanan pinaagi sa City Planning and Development Office (CPDO) sa pakig-alayon sa uban pang mga ahensiya sa kagamhanan naglakip sa TMC.

Matud ni Santos nga ang TMC naglaum ug 500 ang motambong sa matag Biyernes.

"Wala na silang babayaran sila kahit singko dalhin lang nila yung kanilang driver license and OR-CR," tin-aw ni Santos.

Ang tanang drayber sa PUV, nga naglakip sa taksi, dyipney, bus, gikinahanglan nga motambong sa seminar aron nga kuhaon ang ilang driver's ID.

Ang ID maoy usa sa mga mando sa city ordinance nga gipasar niadtong milabay nga tuig nga nagmando sa tanang mga drayber sa PUV nga magbaton ug unipormado nga ID nga giisyu sa lokal nga kagamhanan.

Niadtong milabay nga tuig, ang siyudad miisyu ug 18,000 IDs ngadto sa mga drayber sa PUV nga nagbase sa dakbayan sa Davao. (Jereco O. Paloma)